طرق المذاكرة
كتب بواسطة 👩🏻💻📊DS|retaj
⚠️بداية كل مادة تختلف طريقة مذاكرتها اذا كانت نظري او عملي او مثلا مادة زي المواد الحسابية: التفاضل والفيزياء والى اخره.
📝💬المواد النظرية
هذي المواد كل الي عليكم انكم تكونوا فاهمين مضمون الكلام بدال ما تحفظوه نسخا لصقا هو اكيد بتحفظوه لكن الأهم انكم تكونوا فاهمينه ، بإمكانكم تترجموا الكلام لكن هل تحفظوه بالعربي؟ اكيد لا ممكن تربطوا الكلام او تختصروه عشان يسهل عليكم الحفظ وبالنسبة للكلمات التخصصية بتكرر عليكم بمواد التخصص كثير وراح تتعودوا عليها وتصيروا فاهمينها وحافظينها
المواد النظرية بإمكانكم تقسيم نفس الشابتر الى جزئيات مثلا الشابتر مكون من ٤٥ سلايد ممكن تقسموا عدد السلايدات على يوميين او ثلاث على حسب الي يناسبكم / ممكن ترسلوا للشات الشابتر وتخلوه يترجملكم ويفهمكم مضمون السلايدات وانتوا امشوا معه خطوة بخطوة / ممكن تكتبوا اسم موضوع الشابتر باليوتيوب وبتلقوا كثير شارحينه مو شرط نفس سلايداتكم بس نفس المفهوم والفكرة / وبرضو انصح بطريقة انكم تكتبوا ملاحظات او ملخص بالسلايدات عشان في حال المراجعة تكونوا فاهمين ومتذكرين مضمون السلايد
✍🏻🕯️🔖طريقة المراجعة
1.خلوا الشات يسويلكم كويزات
2.فيه برامج هي تسويلكم كويزات ابحثوا عنها لكن ارجح برنامج +notes وفيه غيره كثير
3.انصح انكم تشرحوا لغيركم يعنيي اعتبروا نفسكم دكاترة هالشيء بيثبت عندكم المعلومات عن تجرببة
4.انصح تكتبوا من كل مادة الجزيئة الي كانت صعبة عليكم عشان تراجعوها بشكل مكثف
🧮📒المواد الحسابية
نجي للمواد زي التفاضل والفيزياء والى اخره هنا الطريقة وانا الي كاتبتها: https://uqucc.sb.sa/almqrrat/ مواد الرياضيات مو صعبة وكلنا بالبداية واجهنا صعوبة فيها لكن فعليا اذا طبقتوا الي قلته بتضمنوا +A بالرااحة المواد ذي تحتاج منكم فقط حل مسائل كثير ومراجعة للقوانين باستمرا رمو اكثر ولا اقل , زي ما عدينا نحن انتوا بتعدوا وتحققوا اعلى الدرجات بإذن الله
ا👾💻المواد البرمجية
بالنسبة للبرمجة هنا الطريقة وبرضو انا الي كاتبتها https://uqucc.sb.sa/almqrrat/baythwn
وبرضو انصح وجدا انكم تبدأوا بمشاريع صغيرة زي مثلا الآلة الحاسبة وفيه باليوتيوب امثلة كثيرة صراحة كل ما اتمرنتوا اكثر كل ما اتقويتوا باللغة وبرضو فيه هذول الموقعين يسووا لكم اختبارات برمجية w3schools | w3school
📚🪄نصائح عامة للمذاكرة
- افهموا قبل تحفظوا حاولوا دائمًا فهم المحتوى قبل حفظه,لأن الفهم يخلي الحفظ أسهل ويثبت المعلومة لفترة أطول.
- تقسم المادة إلى أجزاء صغيرة
- (زي سالفة تقسيم الشابتر قلت الطريقة فوق)
- ابدأوا بالأجزاء السهلة او الجزء الممتع لكم كتهيئة للدراسة
- احرصوا على التوازن بين المواد إذا كان لديك أكثر من مادة تود مذاكرتها، حاول توزيع وقتك بينها بحيث تذاكر مادة الحفظ مع مادة الفهم أو الحساب في نفس اليوم لتجنب الملل.
- لا تعلقوا عند نقطة معينة إذا ما فهمتوا درس او جزئية,اتخطوها مؤقتًا وانتقلوا للشيء الي بعده.
- الجدول الجدول الجدول مهم مهم مهم يساعد على ترتيب يومكم والحد من الضياع والتشتت / بإمكانكم تقسيم الجدول كالتالي اسم المادة- الوقت المحدد للمذاكرة - مدة المذاكرة - عدد المحاضرات او السلايدات المراد مذاكرتها - ملاحظات
في الختام 💫🎖️💯
البدايات دايما كذا بتحسوا بشتات وضياع ومو لازم يكون كل شيء تمام من البداية لأنكم بمرحلة جديدة بيئة جديدة واشخاص جدد راح تتعاملوا معاهم سواء من دكاترة او علاقات , هونوا على نفسكم ولا تضغطوا عليها وانتوا اكيد ما وصلتوا لهذي المرحلة بحياتكم الا وانتوا قادرين تكملوها بامتياز فعليا لا تخلوا خوفكم وانكم مو واثقين بنفسكم يكون عائق مؤبد لأنكم بتضيعوا عليكم درجات حاولوا بأسرع وقت تتداركوا خوفكم وتبدوا بداية جدية وحطيت لكم بخانة التطبيقات برامج واشياء بتفيدكم للمذاكرة شيكوا عليها والانجليزي فعليا مو عائق ولا هو شيء تعجيزي لكم مو الكل دخل الجامعة وهو بلفل عالي في اللغة لكنه طور واجتهد وحاول مو مشكلة لو اخذ منكم الموضوع وقت لكن اهم شيء المحااولة والاستمرارية اتذكروا انكم الحمدلله داخلين تخصص احلامكم وانه هذي البداية الفعلية لمستقبل مشرق او خلينا نقول شوفوا الجانب المشرق من الحياة ولو بعددلكم هي ما بخلص اتمنى لكم التوفيق والدرجات العالية دائما وابدا.