التجربة 1-2

أهلًا بالمهندسين والمهندسات الجدد، وأهلًا بكم في أحلى تخصص، دفعة 48 🤍✨

معكم زميلاتكم مهندسات دفعة 47، وراح نشارككم بعض النصائح اللي نتمنى لو أحد قالها لنا من البداية. أول سنة تعتبر من أجمل سنوات التخصص، وهي حجر الأساس لمعدلكم، وهي أكبر فرصة ترفعونه فيها، وتضمنون بداية قوية بإذن الله.

لا تشيلون هم المواد أو الدكاترة، أغلب المواد ممتعة وسهلة، والدكاترة بشكل عام متعاونين وطيبين. والأهم من كل شي هو اجتهادكم من بداية الترم.

قبل ما نفصل لكم طريقة مذاكرة كل مادة، هذي أهم ثلاث نصايح:

📚 ١- أعمال السنة جدًا مهمة. لو كانت كاملة راح ترتاحون كثير، وتدخلون الفاينل وتجيبون A+ بسهولة، أو على الأقل تكونون ضامنين النجاح. لا تتركون ولا أسايمنت إذا كنتوا مضغوطين، مو مشكلة، خلوا أي منصة موثوقة تسويه لكم، لكن مو كل مرة لازم تعتمدون عليها بدل نفسكم.

👩🏻‍🏫 ٢- الخصوصي من تجربتي اشتركت بأغلب المواد حتى أفهم الواجبات وأستفيد من التجميعات وما أعلق إذا ما فهمت شي.

📝 ٣- ما فيه أي اختبار يتذاكر بيومه أبدًا. آخر يوم خلوه مراجعة وتدريب فقط، لأن إذا ضاق الوقت راح تتوترون وما تلحقون تتدربون. والتدريب جدًا جدًا مهم، ما فيه أي مادة تعتمد على المذاكرة من دون تدريب.

اللغة الإنجليزية (١ + ٢):

المهندسة (١): ما احتجت خصوصي فيه، كنت أرسل لشات القاعدة يشرحلي إياها ثم يختبرني فيها، وأرسله الفوكابلري بنفس الطريقة، وبكذا لكل وحدة. أهم شي اختبروا كثير واحلوا. المهندسة

(٢): اختبرت آيلتس وحذفته.

نماذج متقطعة:

المهندسة (١): أخلص مذاكرة الشابتر ثم أفتح المرجع وأحل أسئلة منه، هذي المادة تشوفونها نظرية لكن الاختبار غير، فتدربوا من المرجع مهم جدًا، اشتركت مع نادية وتابعت معها الشرح وأميرة تدربت معها.

المهندسة (٢): كنت مع أميرة خصوصي، المادة بالسلايدات كانت مفهومة، لكن لما تطبقون على الأسئلة تكون غير، فلازم تتدربون على أسئلة الكتاب حق المادة، هذا كان غلطي الوحيد.

البرمجة (Python + C++):

المهندسة (١): البايثون اشتركت مع سارة عوف، وكنت أرسل الصفحة لشات يشرحها ويشرح الكود بالتفصيل يعني أعرف كل شي بالكود وش فايدته ووش يصير لو تركناه، ثم أسمع الشرح، ونفس الطريقة مع C++ لكن اشتركت فيها مع عمر العربي، وكلهم كنت بعد ما أخلص أتدرب على أسئلة كثيرة من شات، أرسله شابتر شابتر.

المهندسة (٢): كنت مع خصوصي اسمه الكاتو في البايثون، ما كان فيه نماذج كثيرة بس المادة كانت سهلة، بس لا تعطونها أكبر من حجمها. أما C++ مع خصوصي عمر العربي، المادة دسمة أكثر من البايثون بس برضه سهلة بالاختبارات، خلوا شات يسوي لكم كويزات.

التفاضل والتكامل (١ + ٢):

المهندسة (١): أتابع مقطع شرح الأمثلة ثم أحاول أحل الواجب بنفسي، لو ما عرفت أتابع الشرح، ثم أعيد حل كل الأمثلة مع أسئلة الواجب بملف خاص بنفسي وأعيد الحل أكثر من مرة قبل الاختبار، وأحل مراجعات وتجميعات، اشتركت مع المهندس عمر للمادتين.

المهندسة (٢): تفاضل واحد واثنين كنت مع المهندس عمر، الخصوصي ذا على الله ثم عليه حرفيًا، ما عرفت التفاضل إلا منه.

الفيزياء العامة:

المهندسة (١): تابعت الشرح من قناة nasser codes باليوتيوب، وللتدريب اشتركت مع المهندس عمر.

المهندسة (٢): سهلة جدًا، كنت مع وحدة بمنصة شغوف كانت غالية ما أنصح فيها، فيه خصوصين كثير للفيزياء العامة وتجميعات لليل، لا تشيلون همها.

مهارات جامعية:

المهندسة (١): أهم شي تحلون كل الواجبات وتشاركون، يصير معكم ٤٠ درجة أعمال سنة، وبالنهائي ذاكروا ملخصات، أهم شي درجة النجاح. المهندسة

(٢): بس ذاكرت تجميعات وجبت B+.

الكيمياء لمهندسي الحاسب:

المهندسة (١): ما احتجت خصوصي، ذاكرت من شات، أرسله كل صفحة ويشرحلي إياها ثم يختبرني اختبار شامل لكل الشابتر، وتجي نفس أسئلته بالضبط بالاختبار. المهندسة

(٢): سهل، كنت أذاكر مع Notion AI.

التصميم الرقمي المنطقي:

المهندسة (١): أتابع شرح الشابتر لكن ما أهتم فيه كثر التدريب، كنت أسوي ملف لنفسي كله أسئلة أتدرب عليها وأعوّد يدي أحل بسرعة، وهذي المادة يختلف نظامها من دكتور لدكتور، اشتركت فيها مع عمر العربي. المهندسة

(٢): الخصوصي عمر العربي فنان مرة، على الله ثم عليه، كان مختم أسئلة دكتوري عبدالغني، فالحمدلله كان عنده تجميعات لكل شي.