التجربة 1

وعليكم السلام، أنا طالبة HCI.

أول ما بدأ الترم الأول كنت أحاول ألقى أفضل طريقة مذاكرة. في المواد العملية، مثلًا هياكل متقطعة، كانت سهلة علي زي أيام المدرسة، أفك شرح مصعب king ozail وبس أتدرب على المسائل.

بس كانت مشكلتي في المواد النظرية، واحنا تخصصنا جزء كبير منه نظري وكله إنجليزي. فلقيت أفضل طريقة، واللي خلتني أجيب فوق A، هي إني أكبشر السلايدات وأرسل لـ ChatGPT وأقوله يشرح لي سلايد سلايد ويشرحه بالعامية وطريقة بسيطة.

وأهم نقطة، أنا مستواي في الإنجليزي B1، فكنت أقرأ السلايد أول، بعد ما أشوف الشرح غالبًا أفهم من السياق، وهذي أفضل طريقة، لا تترجمون كلمة كلمة، فقط الكلمات الجديدة عليكم واللي صعبة هي اللي تترجمونها، عشان مع الوقت خلاص لغتكم تتطور.

وطبعًا ما يحتاج أقول ذاكروا أول بأول، وإذا أنتم من النوع اللي مستحيل يسوي ذا الشي، على الأقل ركزوا مع الدكاترة وذاكروا بفترة حلوة قبل الميد أو الفاينل، عشان يكون عندكم وقت تفهمون كويس وتراجعون، والمراجعة أهم شي.

طيب فيه شي مهم بخصوص الاختبارات: كيف تفهمون السؤال، خصوصًا إنه إنجليزي؟

أول شي وقت المذاكرة افهموا هذا السلايد يتكلم عن إيش، واعرفوا الكلمات الإنجليزية المهمة فيه. ووقت الاختبار، أول ما تقرون السؤال، شوفوا وش يتكلم السؤال عنه ووش الكلمات الرئيسية فيه، مو لازم تفهمون كل كلمة في السؤال، وبعدها راح تقدرون تعرفون أي سلايد يتكلم عنه.