التجربة 1

تجربتي مع مواد أول ترم كانت أصعب لأنه ما كنت اعرف كيف اذاكر أول بأول للمواد، بس بعد ما عرفت كيف احل واذاكر واتدرب الترم الثاني بفضل الله ثم طريقة المذاكرة رفعت معدلي بشكل مرة ملحوظ وواثقة تقدرون تسوون ذا الشي.

أول شي عندنا نوعين من المواد (حقت التخصص) في مواد كلها رياضيات وفي مواد يبغالها حفظ مصطلحات وفهمها زي "مقدمة في علم البيانات"، و"ذكاء الاصطناعي"، "بايثون" بتجيكم كلها إنجليزي ولازم لازم لازم لمن تذاكرون تحلون عليها أسئلة بنفس المصطلحات اللي تجيكم في السلايدات، لا تسوون حركة إنكم تذاكرونها بالعربي لأن مجهودكم كله بيروح على الفاضي، المواد العربي بتجيكم عربي في الاختبار والإنجليزي بيجيكم إنجليزي بالاختبار.

ولمواد زي التقاضل وغيره مهم مهم مهم كل أسبوع تذاكروا وتدربوا على المحاضرات اللي أخذتوها وأفضل أول بأول، إذا ما قدرتوا خلوها كل أسبوع مرتين أو مرة عشان حقيقي ذي لو ما تتدربون كفاية عليها مراح تعرفون تحلون بالضبط زي القدرات وتفهمون كيف حليتوا لين يترسخ في راسكم.

طيب أكثر حاجات فادتني أول شي في البايثون إنكم صدق صدق ما يكفيكم السلايدات، روحوا شوفوا  شروحات يوتيوب، تعلموا واتدربوا فيها، واغلطوا كثيررر وجربوا كثيررر اكتبوا أكواد بنفسكم حقيقي أحلى طريقة تثبت معاكم (لا تسووها قبل الاختبار، هاذي ساعات الروقان تمكنوا عليها😅)، بالتالي توصلون لمرحلة حتى محاضرات البايثون ما تحضرونها من كثر ما هي سهلة وعرفتوها بالبيت بس من الممارسة (تعبير مجازي)

ونصايح أحلى منجد تجيب لكم A+، الله يخليكم الله يخليكم حاولوا قد ما تقدرون السنة ذي معدلكم ما ينزل عن ٣.٧، كيف تسوون كذا؟

ذاكروا الكويزاتتتت زين ولا تستهينون فيها، وياويلكم تغلطون فيها لأنها غالباً بتجيكم سهلة وتجمعون منها درجات كثير، وسووا المشاريع والواجبات أول بأول عشان لا تتراكم عليكم، لأن الميد ترى على طول بعده فاينل فا مراح يكون عندكم وقت للتراكمات.

قد ما تقدرون لا تنقصون في أعمال السنة عشان في الفاينلل يكون عندكم مساحة إنكم تغلطون براحتكم وتجيبون A+ برضو.