التجربة 1

بنقل لكم تجربتي وايش النصائح اللي كنت اتمنى أحد يقولها لي أول ما دخلت الجامعة:

١- مهما كان الدكتور أو الدكتورة كويسين وتفهموا عليهم لا تعتمدواااا عليهمممم أبدًا أبدًا أبدًا، استخدموا أي مصدر AI سواءً شات أو جيميناي أو ديب سيك وخلوه يشرح لكم (طريقتي كانت أرسل له السلايد الأول وأقول له يترجم لي سطر سطر وبعدها يشرح لي بالتفصيييل ما يسكب حاجة وبعدين يعطيني الفكرة العامة للسلايد). للأمانة الطريقة متعبة وتاخذ وقت ولكن نتايجها حلوة، خصوصًا الترجمة في البداية رح تكون مرة متعبة ولكن محتاجين تسووها عشان تتعرفوا على مصطلحات التخصص شوية شوية، رح تلاحظوا إن الكلمة الوحدة تتكرر في أكثر من مقرر فيصير ما يحتاج تترجموها كل مرة، ولكن خطوة الشرح أنا أشوفها خطوة مرة مهمة، حتى لو انكم فاهمين المحاضرة أنصحكم تسووها، وكمان اطلبوا منه أمثلة لو ما فهمتوا ترا مرة تساعد وتثبت المعلومة.

٢- لا تسكبوا حاجة، سواءً الدكتور أو الدكتورة شرحوها أو ما شرحوها، المحاضرة زي ما تجيكم كاملة افهموها كاملة، لا تقولوا الدكاترة قالوا ذي مو معاكم أو ما شرحوها (لو فعلًا قالوا لكم ذي مو معاكم ارسلوا الجزئية لشات وقولوا له يعطيكم المهم فيها أو ملخص لها، أهم شي لا تسكبوا حاجة).

٣- حاولوا قد ما تقدرون ما تراكموا المحاضرات، الموضوع رح يكون شوية صعب لأن ممكن تاخذوا محاضرتين في أسبوع واحد، ولكن حاولوا قد ما تقدرون في الويكند تفهموا الجزئية اللي أخذتوها هذا الأسبوع (الصدق هذي من الأشياء اللي مرة فادتني، كان صعب وممل بالنسبة لي أني آخذ كل محاضرة في يومها فكنت في الويكند أمسك كل المحاضرات اللي أخذتها ذا الأسبوع، مثلًا محاضرة تشفير ومحاضرة جافا ودرسين تفاضل ودرسين إنجليزي وأفهمها مع شات، ولو كان مقرر فيه مسائل رياضية زي التفاضل والهياكل أتدرب قد ما أقدر، كذا يصير ما يبدأ الأسبوع اللي بعده إلا وأنا فاهمة الجزئية الماضية). مو بالضرورة تحفظوا أول بأول، أهم شي تكونوا فاهمين عشان لما تبدؤن الميدات ما تتعبوا، لأن عادةً يكون بين كل مقرر ومقرر يومين ثلاثة يادوب تلمّون المنهج فأفضل شي تكونوا فاهمين الجزئية من قبل يصير بس تحفظوا.

بالنسبة لطريقتي في المذاكرة تختلف من مقرر لمقرر، فمثلًا المقررات النظرية زي مقدمة في الأمن السيبراني والتشفير التطبيقي، في المقدمة كنت أحط كل جهدي في الفهم لأن الدكاترة كانوا نادرًا ما يجيبوا السؤال نسخ لصق من المحاضرة، دايم يجيبوه بفهم فضروري تكونوا فاهمين (كنت أحب بعد ما أفهم المحاضرة مع شات أرسله فهمي، يعني إن المحاضرة ذي تتكلم عن كذا وكذا ولما يكون كذا رح يصير كذا، وبعدها أقول له يشيك هل أنا فاهمة أو لا).

والتشفير كنت كمان أسوي نفس فكرة المقدمة، ولأنه أدسم شوية من المقدمة كنا نلخص الأشياء اللي تلخبط زي الخوارزميات والهجمات اللي عليها وكذا، وكمان المقرر فيه مسائل فضروري تتدربوا عليها وتفهموها.

أما المقررات اللي فيها جزء عملي زي الجافا والمنطق الرقمي كنت أول حاجة أفهم النظري كويس وبعدها أمسك العملي، لأن لو مسكت العملي بدون ما أشوف النظري وأفهمه رح أشوفه صعب ومتعب فمهم تشوفوا النظري أول (وكنت أحب من ناحية العملي إني أرسل لشات كود البراكتس أو الأمثلة اللي موجودة في المحاضرة وأخليه يمشي سطر سطر يشرح لي إيش فايدة هذا الأمر، مرة كانت تفيدني خصوصًا في جافا ١ لأنها علمتني الأساسيات كيف أسوي متغير وأعطيه قيمة والخ..).

وأما المنطق فللأمانة العملي حقه مرة كان سهل مو زي الجافا، لكن النظري حقه رغم إنه دسم فيه معلومات كثير ولكن كان ينفهممم، وأهم شي زي ما قلت فوق لا تسكبوا حاجة.

ومن ناحية المقررات اللي فيها مسائل زي التفاضل والهياكل، أول حاجة أتكلم عن الهياكل هي كانت أثقل مادة الترم الأول، بس ترا ما يحتاج لها إلا حاجتين بس:

١- تفهموها كوييس، صدقوني بدون فهم مارح تمشي أموركم، ضروري تفهموا متى تستخدموا القانون ذا وكمان لازم تحفظوا القوانين لأن الدكاترة كانوا يحطوا في الخيارات اثنين نفس الشي بس مثلًا واحد يكون الطرح في المقام وواحد يكون الطرح في البسط، فلازم تركزوا في القوانين وكمان تفهموا أساسًا المحاضرة ذي إيش فكرتها وعن إيش تتكلم.

٢- تتدربوا كوييس ما تعتمدوا بس على حقت المحاضرة، شيكوا كمان على الإكسرسايز حتى لو إنها أعلى من مستوى المحاضرات، حاولوا فيها. فعلًا المقرر ذا يحتاج وقت وجهد لا تهملوه، وكمان لا تركزوا عليه وتهملوا الباقي.

أما التفاضل فهو مقرر حلو وخفيف وكله من التحصيلي والثانوي، أهم حاجة تراجعوا القوانين وتتدربووا، التدريب مرة مهم في التفاضل.

ومن ناحية المقررات العامة زي الإنجليزي، القرآن، التجويد، المهارات، التفكير التصميمي، كلها مقررات سهلة وتنفهم، ولكن هذا ما يعني إنكم تسكبوها لا وأبدًا، كل مقرر لازم تعطوه حقه، ولا تشيلوا هم الإنجليزي تراه سهل وتافه، أهم شي ذاكروه صح بإنكم تركزوا على أهم حاجتين الفوكاب والقرامر.

من ناحية الفوكاب ترجموا كل الكلمات، وممكن لو فيه كلمات جديدة عليكم تحطوها في جملة رح تساعدكم في تذكر معنى الكلمة.

ومن ناحية القرامر احفظوا القواعد كوييس (أنا كنت أرسل لشات الصفحة حقت القرامر وأقول له يشرحها لي ويعطيني أمثلة، وكيف أكتب جملة مثبتة بهذي القاعدة وكيف أكتب منفية وكيف أكتب سؤال وكيف صيغة الجواب زي كذا، أطلب كل حاجة منه بس كنت أقول له ما يخرج عن القاعدة لأن قواعد الإنجليزي كثيييرة ومتفرعة)، صدقوني بإذن الله بذي الطريقة رح يكون الإنجليزي لعبتكم.

وفي الأخير أقول لكم حياة الجامعة حلوة ومو بس مذاكرة وطفش، كل حاجة تحتاج موازنة، لازم توازنوا بين المقررات ما تذاكروا واحد من قلب وتسحبوا على الباقي، ونفس الشي في الجامعة تقدروا تستمتعوا بحياة الجامعة وفي نفس الوقت تذاكروا وتجتهدوا، ترا التخصص حلوو وممتع والمقررات حتى لو إنها صعبة ودسمة تراها حلوة وممتعة، وفالكم التوفيق.