التجربة 2

الحمدلله جبت معدل عالي بالترمين، صح مو كامل، ولكن كأول سنة ولسه ما أعرف إيش الطريقة الصح للمذاكرة حلو مرة.

فيه عدة نصايح اتّبعتها ولو انعاد الزمن فيني سويتها من الترم الأول:

١- اشتركوا مع شات أو جيميناي أو كلود أو أي مصدر AI واعرفوا كيف تتعاملوا معاه وكيف تفهمون عليه، لأن مع المستويات المتقدمة ما فيه خصوصين. أرسلوا الشابتر لشات مثلًا واكتبوا له ذا النص:
(اشرح لي الفكرة العامة من الشابتر وعلاقتها بالمقرر، وبعدها ترجم كل سلايد كلمة كلمة، وإذا خلصت السلايدة اشرحها بشكل عميق كأني ما أعرف شي).
سووا كذا مع كل المقررات، وإذا فيه أي نقطة ما فهمتوها اسألوه عنها لين تفهموها.
وبرضو فيه مقرر بتاخذوه الترم الثاني (منطق رقمي وتنظيم حاسوب)، أنصحكم بعد كل شابتر ترسلوا كل اللي أخذتوه وتطلبوا منه يربط لكم الشباتر ببعض، لأن المنهج كله مترابط، بس غالبًا ما بيوضح لكم كيف الربط.

٢- لا تراااكموا، لا تراكموا صح، بتجيكم أسابيع غصب يتراكم المنهج عليكم، بس من يوم تسمح لكم الفرصة لمّوا المنهج، لموه، بتوصلوا للفاينل وانتوا فاهمين وحافظين، والمطلوب منكم فقط زيادة مذاكرة والجهد بيقل عليكم.

٣- بالنسبة للمقررات، بتكلم عن مقررات الكلية والتخصص، لأن هي أكثر شي بتتعبوا وتضيعوا فيه. بأول ترم راح تحتاجون تترجموا كل شي وتفهموا وتحفظوا، عادي مرة كلنا بالبداية كنا كذا وحسّيناه كثير، بس مع الوقت مصطلحات التخصص أو الحاسب بشكل عام راح تتكرر وتصيروا تفهمون المطلوب من غير ترجمة.

وأهم شي قبل أتكلم عن المقررات: لا تتركوا جملة بالسلايد ما تفهمونها بحجة الدكتورة ما ركزت عليها بالشرح أو توقعتوا إنها ما راح تجي، ذاكروا وافهموا كل شي مكتوب إذا تبغون درجات عالية، الموضوع مو صعب أبدًا، صح بياخذ وقت بس بالنهاية بتلاقون نتيجة تسركم وتسعدكم.

- مقدمة بالأمن السيبراني: المقرر نظري ويعتمد على الفهم والحفظ مع بعض، ركزوا على المصطلحات المتشابهة وافهموا كل مصطلح إيش يعني واحفظوا التعاريف، ونصيحة عشان ما تحسون إن المقرر نظري بحت وتطفشون: لما تفهمون المقرر مع شات خلوه يعطيكم أمثلة بالنهاية على كل نقطة، يصير تربطون المعلومة وبنفس الوقت تستمتعون فيها.

- جافا ١ وجافا ٢: كثير يخافون من جافا، بس الحقيقة ينفهم إذا ذاكرتوه صح وسويتوا كل لاب بنفسكم. أفضل طريقة تسووها عشان يسهل عليكم وتستمتعوا بالمقرر: ذاكروا الجزئية النظرية دايم قبل العملي عشان تفهموا وبعدها طبّقوا العملي. ونصيحة لكم: اللابات افهموها أول بأول لا تراكموا وتسلموا بس عشان الدرجات، لأن بيجي فاينل العملي وتتعبون. جافا مو صعبة أبدًا، يبغالها ممارسة وفهم وبيمشي الوضع معاكم.

- المنطق الرقمي وتنظيم الحاسوب: المقرر يبغاله فهم بشكل مو طبيعي، طبعًا فيه عملي ونظري، بس العملي من سهولته ما عندي شي أقوله، لكن النظري دسم ويبغاله تركيز. ذاكروا أول بأول، وكل شابتر بتحسّونه منفصل عن اللي قبله، بس الحقيقة كلها مرتبطة ببعض من البوابات المنطقية لين الذاكرة وطريقة عمل الكمبيوتر بشكل عام، افهموا الشباتر واربطوها ببعض كل ما أخذتوا شي جديد.

- الهياكل المتقطعة: أنا ضعت بطريقة مذاكرته ونقصت شوية بالميد والكويزات لأني ما عرفت طريقة المذاكرة الصح، وللأسف عرفتها بوقت الفاينل. لو انعاد فيني الزمن كنت بفهم كل نقطة بالسلايد وأحل الإكسرسايز، لأنه مرة يساعد بالتدريب (بوقت الميد ما كفاني الوقت واكتفيت بالشباتر). عشان كذا ذاكروا أول بأول وحاولوا دايم تتدربوا على كل شابتر وتفهموا كل شي فيه.

- التشفير: المقرر ذا متعة متعة، إذا تحبون السايبر بتستمتعون فيه مرة. ما أنكر إنه دسم وفيه معلومات كثير والخوارزميات خطواتها تختلف وممكن تتلخبطون، والمقرر يعتبر نظري وحسابات. لذلك أفضل طريقة سويتها كنت أرسل كل شابتر لشات وأعطيه نفس الوصف اللي كتبته لكم فوق، وإذا ما فهمت نقطة أقول له يشرحها ثاني ويتعمق فيها، وحتى أوقات يعطيني شرح خارج الشابتر عشان أفهم. وبعد ما تخلصون شابترين أو ثلاث بتلاحظون فيه أشياء مشتركة أو فيه أشياء لازم تربطوها أو تلخصوها، وذا اللي سويناه أنا والبنات بوقت المراجعة، كنا نركز على الأشياء المتشابهة.
وبالنسبة للخوارزميات، افهموا كل خطوة وإيش العمليات اللي فيها حتى لو قالولكم ما تجي، لأن راح يجي سؤال على الأقل منها. وفيه بعضها فيها حسابات، افهموا اللي بالشابتر زي الناس وخلوا شات أو أي مصدر AI يسوي لكم أسئلة بنفس النوع وحلوها، لأن راح تجي كحل وانتوا تطلعون نتيجة التشفير أو المفتاح المشترك وغيرها.

وآخر شي أتكلم عن التفاضل: المقرر ذا مسبب رعب لكل الناس ودايم يخافون منه، والحقيقة؟ من أسهل المقررات وأمتعها إذا ذاكرتوه بطريقة صح، وهي: افهموا الدرس وشوفوا شرح عليه، وبعدها حلّوا الأمثلة اللي بالدرس، وآخر شي ثبّتوا فهمكم بتمارين الواجب نهاية الدرس. المقرر سهل سهل إذا عرفتوا كيف تذاكرونه بطريقة صح، ويحتاج له فقط تدريب وحل مسائل أكثر.