التجربة 1

مواد التخصص ⬇️

الترم الأول:

تنظيم الحاسوب والمنطق الرقمي: المادة ذي أبدًا لا تتهاونون فيها، صحيح إنها مفروض تكون بمستوى أعلى دراسيًا عشان أفكارها جديدة ومعقدة، لكن تقدرون تعدونها بإذن الله. وتحتاجون فيها مصادر يوتيوب أو خصوصي، وتعتمد على الفهم بشكل كبيير جدًا، صراحة ممكن تنسون وتتلخبطون بالمعلومات، فعشان كذا أكّد إنه لازم مذاكرة مستمرة وتراجعون وتربطون عشان ما تتلخبطون بين الرسمات والدوائر. وبعض الاختبارات ممكن تجي مقالية، وفيها مشروع تسوونه ولابات أسبوعية.

برمجة جافا: المادة تعلمكم بالبداية أساسيات البرمجة، بعدين تدخلون تتعلمون أكثر عن الجافا. وبالبداية بتواجهون كلام أغلبه حفظ، وهو مهم تفهمونه وتحفظونه برضو من ناحية المصطلحات، لو تجمعون الكلمات الجديدة عليكم بقاموس بيساعدكم. وتدربوا كثيير بالعملي، ذا هو الأساس عشان تحلون أسئلة الأكواد بالنظري، فيه لابات أسبوعية.

الترم الثاني:

أسس هندسة برمجيات: ذي المادة مبنية على الحفظ بنسبة ٧٠٪ والفهم يكون للرسمات عشان تسوون المشروع، وكلامها ممكن يكون دسم كثير، بس حاولوا بكل شابتر تركزون على أهم الأشياء والأشياء المكررة، والتفصيل الزايد فهم بس. فيها مشروع متقسم على مراحل.

تطوير التطبيقات كائنية التوجه: ذي المادة أكثر شي تأخذ مجهود بالمشروع، لأن كل حرف تتعلمونه لازم تطبيقه، وكان مشروعنا على مراحل نسلمه مع تقارير. والمادة تعتمد ٥٠٪ حفظ لمصطلحات OOP والمفاهيم حقتها و٥٠٪ فهم عميق للأكواد، وبرضو التدريب جدًا جدًا مهم، وفيها لابات أسبوعية.

الهياكل الحسابية: ذي المادة إذا درستوها بالبدايات راح تشوفون قد إيش فيه أشياء مشابهة من التنظيم، لأنها الأساس، وتتكلم عن منطق التفكير والـ Sets والدوال والعلاقات والقراف. مذاكرتها فهم خالص، وتدربوا حلوا أسئلة من AI أو أسئلة سابقة، وفيها مشروع ولابات أسبوعية.

المواد العامة:

الإنقلش: ركزوا بالمذاكرة على القرامر والفوكاب والاستماع والقراءة، كلهم يجون بالميد ومن المنهج، الكتاب ولا النشاط ولا كامبردج أو مشابه له نفس الأفكار، وعندكم تاسكات في الرايتنق تكتبون وتسلمون، وبرضو تاسكات سبيكنج تتحدثون، وفيه رايتنق يجي بالنهائي عليه ٥ درجات مهم جدًا، لأن ما راح تعرفون المواضيع، فحاولوا تدربون نفسكم زين.

الفيزياء والتفاضل: تقريبًا طريقة مذاكرتها كوبي بيست من الثانوي بس زيادة بالإنقلش، وأكيد مذاكرة أول بأول وحفظظظظ القوانين وتكرارها جدًا مهم، والحل باليد هو المفتاح. وبرضو شوفوا مصادر تشرح كويس عشان يثبت الفهم وما تتلخبط المعلومات على بعض، وطبيعي لو استصعبتوا بالبداية لكن حتعدون بإذن الله، لا تستسلمون.

والقرآن: اقرأوا واحفظوا الآيات ضروري مع شيخ التجويد، جدًا مهم. عندكم الترم الأول تلاوة تجويد من سورة الفاتحة إلى آل عمران، اللي أذكر وقفنا هنا، والترم الثاني حفظ سورة الكهف كاملة، وكله طبعًا بالتجويد.

والتفكير التصميمي ومهارات جامعية: مواد عادية وسهلة وبالعربي، وكلها حفظ وربط وملخصات، ما تأخذ منكم مجهود يقارن بأي مادة ثانية، وفيها مهام وواجبات ومشروع.