التجربة 2

طبعًا تخصصي هندسة برمجيات، وحبيت أفيد البنات إن شاء الله.

أول شي حابة أنوّه إن مو كل الدكتورات يشرحون كويس، فلا تعتمدون على شرحهن فقط.

بالنسبة لبرمجة الحاسب بلغة جافا، أنا كنت مشتركة مع خصوصية اسمها سميرة، وكان شرحها مميز وواضح، والله مو تطبيل، لكن عن تجربة كنت أحاول أشوف كل فيديوهاتها وأطبق معها أول بأول، عندها ملخصات وملف تأسيس وتأسسك من الصفر وكنت دائمًا أطبق معها. الاختبار العملي كان عبارة عن كتابة كود، الدكتورة تعطيك المتطلبات وأنتِ تكتبين الكود، مثل تكتبين Method أو أي شي تطلبه. بعد توفيق الله كانت شروحاتها وملخصاتها من أكبر أسباب نجاحي، تشرح كل شي، لكن المشكلة الوحيدة إن سعرها شوي مرتفع، لكن تقدرون تدفعون لها على دفعات. باختصار أنا كنت أذاكر الجافا من خصوصية سميرة.

بالنسبة للفيزياء كان فيه قنوات في التلقرام واليوتيوب تشرح المنهج. إذا ذاكرتوا كل درس بعد ما يخلص، أو حتى خصصتوا نهاية كل أسبوع للمراجعة بدون مراكمة، بإذن الله بتسهل عليكم المادة، وفيه قوانين كثيرة احفظوها، واستخدموا الذكاء الاصطناعي يعطيكم مسائل تدريبية عشان تتدربون أكثر.

أما القرآن فأعطوه من وقتكم، منجد من أسهل المقررات لكنه يحتاج تركيز، اسمعوا لشيخ وراجعوا أحكام التجويد المطلوبة، حرام تنقصون فيه.

وبالأخير إذا فيه مادة تحسينها صعبة مرة، شوفوا لها خصوصي أو شروحات باليوتيوب، وكمان شيكوا على ملفات الدرايف وشوفوا طريقة أسئلة الكويزات والميد والفاينل. والميد مهم جدًا ويأثر على درجتكم فلا تستهينون فيه. وتوكلوا على الله واعملوا بالأسباب، والله يوفقكم جميعًا. سبحان الله وبحمده سبحان الله العظيم.

الترم الثاني

أسس هندسة البرمجيات هذي المادة يبغى لها مراجعة أول بأول وما ينفع أبدًا تراكمونها. أنصحكم تترجمون السلايدات وتفهمونها وتحاولون تحفظون المصطلحات لأن أغلبها قريب من بعض وممكن يلخبطكم بالاختبار. وكمان شيكوا على أسئلة السنوات أو الاختبارات السابقة عشان تعرفون طريقة الأسئلة. اختباري كان أغلبه صح وخطأ وكانت المصطلحات شوي معقدة، فكانت تحتاج تركيز وفهم أكثر من الحفظ. إذا راجعتوا باستمرار وفهمتوا المصطلحات، بإذن الله بتكون المادة سهلة عليكم.

الهياكل الحسابية هذي المادة بالنسبة لي كانت شوي تلخبط بالبداية. كان فيه كلاسات عملية ولابات، وأنصحكم بعد كل كلاس عملي ترجعون تطبقون وتحلون اللاب مرة ثانية بنفسكم، لأن التطبيق هو أكثر شي يثبت المعلومة.

برمجة OOP بلغة جافا هذي المادة لا تراكمونها أبد، راجعوا أول بأول ولا تخلون أي نقطة تتأجل لأن كل درس يعتمد على اللي قبله. ولا يكون مذاكرتكم قراءة بس، لازم تطبقون وتكتبون الأكواد بنفسكم لأن التطبيق هو اللي يثبت المعلومة. وبرضو أي مشروع لا تخلونه لآخر وقت، ابدأوا فيه بدري وكل فترة اسألوا الدكتور عن شغلكم هل كذا صح أو يحتاج تعديل، وسجلوا كل الملاحظات اللي يقولها لكم عشان ما تنقصون درجات على أشياء بسيطة.