التجربة 4

كأول سنة، ركزوا فقط على درجاتكم ومعدلكم، باقي الأشياء يمديكم عليها. أهم شيء تتعودوا على الجامعة وتتعرفوا عليها، وعلى طريقة التعامل هناك مع الطلاب والدكاترة، واعرفوا الخدمات اللي تقدمها الجامعة زي الخدمات الصحية وكذا.

بالإجازة طوروا الإنجليزي عندكم. أنا أول محاضرة لي لما كنت مستجدة انفجعت، كل السلايدات إنجليزي وكلام كثير والخ… ترا شيء طبيعي.. كنت أصيح وأقول: شلون أذاكر كذا؟ أقعد أترجم ومدري وش!! سيبوكم من التهاويل ذي لان بكل بساطة مع الوقت تتطور لغتكم وإنتوا ما تحسون. إي نعم، بالبدايات ترجموا وافهموا كل سطر حبة حبة، الموضوع إنكم بس تعطون أنفسكم وقت. ولا تخافون، أغلب الدكاترة شرحهم بالعربي وشوية إنجليزي، ونادر يكون كل الشرح إنجليزي.

إذا تخصصكم تقني، خذوا لابتوب. مو مهم الشركة، أهم شيء المواصفات المطلوبة تكون موجودة، والمواصفات تلقونها بقروبات الدفعة بالتليجرام.

إذا كنتوا وحيدين وما قدرتوا تشوفون لكم أصحاب، ترا عادي، وكثير طلاب زيكم. تفاعلوا بقروب الشعبة، شاركوا بالمحاضرة، خلكم واضحين يعني مو مرة صمت دايم. سولفوا مع اللي جنبكم عن أي موضوع، امدحوا بعض مدحة عابرة، ابتسموا، وعاد إن شاء الله تتكون علاقات كذا من الكلام.

وإذا فيه عمل جماعي، زي برزنتيشن مثلاً، تعاونوا فيه وساعدوا بعض، وخليكم متفاهمين وكل واحد يسوي مهمته. وإذا أحد عنده ظروف، تعاونوا مع بعض عشان كل شيء يمشي زي العسل.

طبعًا تقدروا تشوفوا جداول الدكاترة وإيميلاتهم عشان إذا تبوا ترسلوا لهم شيء من موقع الجامعة.

وطبعًا فيه دكاترة شرحهم مو ذاك الشرح الكافي والوافي أو ما ناسبكم، بس عادي، افتحوا اليوتيوب واكتبوا موضوع المحاضرة حقتكم وتفهمون إن شاء الله. والدكاترة السيئين اللي مو متعاونين موجودين في كل الجامعات ترا، حاولوا تحافظون على درجاتكم وتسوون اللي عليكم وضميركم مرتاح.

ذاكروا قبل الاختبارات بمدة كافية، مو يوم أو يومين! وقد ما تقدرون جيبوا كل أعمال السنة كامل، عشان إذا نقصتوا بالاختبارات تكون الأشياء الباقية كاملة عندكم؛ لأن الاختبارات هي الأصعب مقارنةً بالواجبات البسيطة!

بالمذاكرة استخدموا تطبيق NotebookLM رهههههيببب واو! تعطونه ملفات المحاضرة عندكم ويشرحها وما يخرج عنها أبدًا. وإذا تبون يشرحها لكم كمقطع فيديو أو مقطع صوتي، يسوي عرض كامل وأسئلة كويز ومليون شيء بعد!

فيه دكاترة يحبوا المشاركة أثناء المحاضرة، فاقعدوا شاركوا، عشان إذا طلبتوا منهم درجات أو شيء يعرفونكم إنكم مجتهدين وكذا.

بعد السنة الأولى، هنا خلاص ركزوا على تخصصكم. إذا كان تخصصكم عام وتحته مسارات، ابدؤوا شوفوا المسارات واقرؤوا عنها، وحددوا مجالكم المهني اللي بتطورون أنفسكم فيه وتمشون عليه بقية رحلتكم.

وافتحوا حساب لينكدإن. بالبداية بيكون فاضي أكيد؛ لأنكم توكم طلاب وما عندكم خبرات، بس حطوا مثلاً شهادات ورشة عمل أخذتوها عن بعد أو كانت في الجامعة.

روحوا مؤتمرات، وادخلوا نوادي الجامعة عشان المهارات الناعمة، زي المهارات الاجتماعية، تتطور عندكم، وهذي من أهم مهارات المستقبل.
فيه قروبات بالتليجرام ترسل إعلانات لدورات وبرامج ومعسكرات تدريبية وورش، وعليها شهادات من مختلف التخصصات، حرفيًا كل المجالات.
آسفة طولت معاكم، بس منجد معلومات مفيدة 🤍.