التجربة 8-9

التجربة 8

في بداية الترم الأول كنت ضايعة الصراحة، وما كنت عارفة من فين أبدأ، وسمعت كثير يقولون لي ذاكري أول بأول، بس هذا الشي كان يرهقني مرة إني أرجع من الدوام وأذاكر. واللي سويته كنت ألمّ المنهج اللي درسته بنفس الأسبوع وأذاكره خميس وجمعة وسبت، ويكون ذهني صافي وأنا أذاكر، آخذ ساعتين تقريبًا، وهالشي مرة فادني بالميدات والفاينل.

بتكلم الآن عن المواد اللي تبي لها تركيز مرة:

في الترم الأول:

برمجة جافا ١: المادة سهلة وكتكوتة، وفي البداية كنت خايفة منها وكانت المادة مبهمة بالنسبة لي، لكن مع المذاكرة صارت مرة واضحة.

مقدمة في الأمن السيبراني: المادة كانت حلوة، لكن نصيحة: لا تراكمونها، المنهج والمصطلحات فيها دسمة مرة، وأهم شي ركزوا في شباتر التشفير لأن كلها بتجيكم في مقرر التشفير الترم الجاي وبتتعمقون فيها.

هياكل متقطعة للأمن السيبراني: بالنسبة لي هذي أصعب مادة مرّت علي هالسنة، نصيحة: ذاكروها أول بأول ولا تراكمون المنهج، يبي له ذهن صافي.

الترم الثاني:

التشفير: المادة ذي تجنن، وتحسسكم بالذكاء وانتوا تفكون التشفير هههههه، حرفيًا كأنها لعبة.

المنطق الرقمي وتنظيم الحاسب: هذي المادة مبهمة مرة وغريبة بالنسبة لي، اللي يحبون الفيزياء والكهرباء بتعجبكم، أنا ما حبيتها صراحة لكن عديتها بقريد كويس.

برمجة شيئية بلغة جافا: كانت أثقل مادة بهالترم وشوي معقدة، ونصيحة: لا تراكمونها، لأني راكمت المنهج وجبت العيد في الميد.

وطريقة مذاكرتي كنت أرسل السلايدات لشات جي بي تي وأقول له يشرح لي كل شي خطوة بخطوة، وهالشي مرة فادني ووفّر فلوسي بدال ما أدفع للخصوصيين وما أفهم شي.

التجربة 9

السنة الأولى لطالبة أمن سيبراني - تأهيلي

بشاركم تجربتي من خلال إجابة الأربع أسئلة ذي: هل اللغة بتكون عائق؟ هل لازم تكون عندي معلومات ومعرفة مسبقة؟ كيف طريقة المذاكرة؟ هل سهل إني أعدي التأهيلي؟

١- أول شي، اللغة مو عائق أبدًا، لغتي كانت عادية وأقل من العادية، بالبداية صراحة يكون صعب ومع الوقت والترجمة والتكرار للمصطلحات والكلام حرفيًا يسهل عليكم وما بتحتاجون بعدين للترجمة، ولغتي خلال هالسنة تطورت فعلًا وصارت أفضل.

٢- لا، مو لازم، دخلت التخصص وأنا صفر معلومات عنه، ولا أعرف عنه شي عن البرمجة أو عن أي مواد تخص التخصص، بس مع الوقت تعلمت وصرت أعرف عنه أكثر وأكثر.

٣- اكتشفوا طريقة المذاكرة اللي تناسبكم من بدري وتقدرون عليها. نهاية الترم الأول عرفت طريقة المذاكرة المناسبة لي ودرجاتي في الترم الثاني كانت أفضل من الأول بكثير، كنت اعتمد إني أذاكر بالانقلش وأفهم بالانقلش، وأي مصطلح غريب أو جديد أترجمه وأكتب فوقه وأحفظه.

الطريقة ذي جدًا مفيدة وأفضل عشان يسهل عليكم فهم الأسئلة بالاختبارات، وبنصح نصيحتين مهمة جدًا: الأولى، الكل اجمعوا عليها، إنكم لا تلمّون المنهج ليلة الاختبار أبدًا، ما تنفع، وعقلكم ما راح يستوعبها. الثانية، من ناحية البرمجة والواجبات والمشاريع، الأفضل الأفضل إنكم انتم اللي تسوونها وتفهمونها وتحلونها لا نصح بإستخدام الـ AI إنه هو اللي يسويلكم الشي من الصفر وخصوصًا بالبرمجة، تعلموا تبرمجون من نفسكم ولو فيه شي ما فهمتوه فقط وظيفة الـ AI يشرحه لكم أو يعدل لكم صدقوني بتستفيدون كثير ويسهل عليكم الاختبارات النهائية جدًا من الناحية النظرية والعملية.

٤- نعم سهل إنكم تعدون التأهيلي ومقدور عليه، بس لازم تتفقون إنكم لازم تشدون حيلكم مهما واجهتم من صعوبات أو عوائق، تقدرون تعدون وفيه فرص كثيرة برضو إنكم تعدون هالسنة، زي ما عدينا نحن تقدرون تعدون بإذن الله.

ختامًا، دائمًا وأبدًا اعملوا الأسباب وتوكلوا على الله، لا تخافون ولا تترددون الخوف والتردد عدو النجاح، تذكروا أن ربي معكم دائم وما بيخليكم، ويوم أقصد كلمة صعب في كلامي مو معناته أنه معقد ومستحيل، هو فقط شي جديد ومع الوقت بيسهل بإذن الله، ولا تسمعون لأي شخص يحطمكم لأنكم قدها بإذن الله.

هذي تجربتي خلال السنة الأولى واستفدت منها كثير، وأتمنى إنكم استفدتم :)