التجربة 6-7

التجربة 6

أنا تخصصي أمن سيبراني تأهيلي، وكتأهيلي يعني ما كان عندي رفاهية الإهمال أو المذاكرة ليلة الاختبار. فكنت بداية السنة، الصدق، أجرب أذاكر بطرقي القديمة زي طريقة الـ٢٥ دقيقة وبعدها بريك، ومافادت. وجربت أكثر من طريقة ما فادت، لا مع التعفن الدماغي ولا مع دسامة المواد.

فاللي اكتشفته على نهاية الترم الأول إنه التكرار والمراجعة المستمرة مرة تنفع، لأن بالمرة الأولى بفهم ٥٠٪، المرة الثانية ٨٠٪، لين أوصل للفهم والحفظ والإدراك التام. كنت أول مرة أشوف الشروحات سواء مقطع أو بنفسي أفهم من السلايدات نصًا وأشر على النقاط الدسمة اللي تحتاج تركيز، والمرة الثانية أرجع أراجع لكن من نفس السلايدات وكأني أشرح، والمرة الثالثة أسوي من تطبيق Notebook اختبار وملخص نص وبطاقات أسئلة، وليلة الاختبار أراجع لو فيه تسريبات. وبكذا أكون قفلت بنسبة ١٠٠٪ من المادة من كل النواحي والمراحل اللي ذكرتها. مو شرط تكون ورا بعض، بعضها كانت بينها أسبوع وبعضها أكثر، بس الفكرة بالتكرار.

وبالترم الثاني استوعبت إنه ما له داعي أوصل للفاينل وأقعد خايفة بمادة معينة إني أعديها أو لا، لأن للأسف صارت في مادة وحدة معايا كذا. فكنصيحة ثانية: من بدري اضمنوا الميدات، عشان في الفاينل يصير تفكيركم بكيف أجيب درجات أعلى بدون توتر وضغط.

وأهم نصيحة: الدعاء، واحتسبوا الأجر كل يوم بخط الجامعة، لأنه في سبيل طلب العلم.

والله يوفقكم جميعًا وادعولي❤️

التجربة 7

أنا تأهيلي، ومرة كنت خايفة إني ما أجيب معدل عالي، بس شديت حيلي مرة، وبقول كيف:

أي محاضرة تكونون مركزين فيها مع الدكتورة، ذي المحاضرة بتكون أسهل محاضرة تذاكرونها بالمنهج، لأن شرح الدكتورة يكون غير غالبًا.

المراجعة: إذا رجعت البيت أحب أتذكر بس وش أخذت اليوم، بس كذا بعقلي يعني.

أيام الفاينل والميدات ما فيه شي اسمه ليلة الفاينل أذاكر أو ليلة الميد، كنت أعطي كل مادة حقها بالمذاكرة: الفاينل أذاكر قبل بـ٣ أسابيع أو شهر كذا، والميد قبل بأسبوع أو أسبوعين. يعني كل مادة أعطيها حقها منجد وما أحاول أضغط على نفسي بالمعلومات.

وقت الاختبار راجعوا التظليل، ذا شي أساسي كثير.

وإذا حسيتوا إنكم ما تستحقون الدرجة وإنكم جايبين أقل من المفروض، روحوا راجعوا ورقتكم، مرة عادي، لأنه تصير أوقات أغلاط بالتصحيح.

وبس، بالتوفيق.