التجربة 3
قبل ما أتكلم وأشارك تجربتي، حبيت أوضح شيء. أنا الحمدلله أنهيت أول سنة بمعدل عالي، فالكلام اللي بذكره مو مجرد توقعات، وإنما أشياء طبقتها بنفسي وفرقت معي. قبل كل شي بذكر كم نقطة أتمنى أي مستجد يستفيد منها ويبدأ صح من البداية.
مذاكرة الجامعة تشبه القدرات والتحصيلي بشكل كبير: تسمعون شرح المحاضرة، بعدين تذاكرونها لحالكم، وبعدها تحفظون، وآخر شيء تتدربون على الأسئلة والتجميعات لين تدخلون الاختبار.
أهم شي: لا تراكمون. حاولوا تخلصون كل جزئية قبل الاختبار بوقت، عشان يكون عندكم وقت للمراجعة، والترجمة، وحل التسريبات.
وبرضو لا تستهينون بالميد. من أكثر الأشياء اللي لاحظتها أن الميد هو اللي يحدد القريد، فحطوا فيه جهد (ويمكن أكثر من الفاينل اللي بتدخلونه غالبًا عارفين نظامه)، لأن غالبًا لو نقصتوا بالميد بشكل كبير بتنحطون بضغط إنكم تنزلون قريدات أكثر، وممكن الضغط ذا يضيّع عليكم كثير درجات من أشياء ثانية. وإذا جبتوا فيه درجة كويسة، بتدخلون الفاينل وأنتوا مرتاحين وعندكم مجال للخطأ.
أنصحكم أول شي تصنفون المواد إلى مواد تعتمد على الحفظ ومواد تعتمد على الفهم، لأن طريقة مذاكرة كل نوع تختلف. *(أنا إنسانة بصرية، أكثر شي ساعدني إني أترجم كل شي وأحدد بألوان مختلفة، وهذا سهّل علي المراجعة بشكل كبير).
*مواد الحفظ بالنسبة لي كانت مثل: مقدمة في الأمن السيبراني، جافا، المنطق الرقمي، والتشفير.
لا تبدأون بالحفظ مباشرة، افهموا أول وبعدها احفظوا. ومروا على كل نقطة في السلايدات، ولا تتركون أي معلومة، لأن أحيانًا يجي بالاختبار سؤال يعتمد على فكرة انشرحت بالمحاضرة لكنها مو مكتوبة بالنص. الطريقة اللي نفعت معي:
أسمع المحاضرة وأذاكرها بنفسي (حاولوا تدورون على المعلومة بنفسكم، لا تاخذون تحديد أحد ولا ترجمة جاهزة، الشي ذا يفرق بثبات المعلومة كثير).
أستخدم ChatGPT أو Gemini يشرح لي سلايد سلايد.
أترجم وأحدد المعلومات بألوان ثابتة (التعاريف لون، النقاط المهمة لون، والأشياء اللي تعتمد على الفهم لون ثاني أو بدون تحديد).
المصطلحات الصعبة أحددها بلون واضح وأربط معناها قبل الحفظ.
الجافا والمنطق الرقمي فيها لابات عملية لا تهملونها، لأنها تثبت لكم النظري بشكل كبير.
وبعدها يبدأ الحفظ، وآخر خطوة المراجعة. أكثر شي كان يثبّت لي المعلومات هو إني أشرحها لغيري حتى لو مرة وحدة.
*مواد الفهم بالنسبة لي كانت مثل: هياكل متقطعة والتفاضل.
في هذي المواد أهم شي الفهم ثم كثرة التدريب والحفظ، لا تخلونه حرفي بس احفظوا الفكرة العامة. أنا ما كنت أحتاج فيها ChatGPT لأن السلايدات كانت واضحة، لكن كنت أحرص أفهم كل نقطة وما أتجاوز أي جزء. بعد الفهم، حلّوا أكبر قدر ممكن من التمارين قبل بوقت، وأي سؤال تشوفونه صعب حطوا عليه نجمة، عشان وقت المراجعة ترجعون للأسئلة المهمة مباشرة. وإذا فيه تسريبات لا تتركونها، لأنها تعطيكم فكرة عن طريقة الأسئلة.
*باقي المواد العامة لا تعطونها جهد أكبر من اللازم، لكن لا تهملونها.
أنا كنت أعطي مواد التخصص الأولوية وأذاكرها أول بأول، أما المواد العامة فكنت أركز مع الدكتورة وقت المحاضرة، وأسجل ملاحظاتي، وما أبدأ أذاكر لها غير قبل الكويز أو الاختبار بـ٣-٤ أيام.
اللغة الإنجليزية: مثل الثانوي، ركزوا على الفوكابلري والقرامر والنوتات. وأنصحكم تخلصون واجبات كامبرج (تشبه المنصة بالثانوي) من بداية الترم عشان تتفرغون لباقي المواد.
التجويد وحفظ القرآن ١: ركزوا على تطبيقكم للتجويد أثناء الحفظ والتلاوة، لأني حسيته أكثر شي يركزون عليه وتقدرون تكسبون الدكاترة منه، وطبعًا لا تراكمون الآيات.
التفكير التصميمي ومهارات جامعية: مواد خفيفة وبالعربي (تشبه التفكير الناقد)، وإذا ركزتوا بالمحاضرة غالبًا ما بتحتاجون وقت طويل للمذاكرة.
وفي النهاية حاولوا قد ما تقدرون ما تنقصون بأي تسليم أو واجب أو مشروع، وسلّموها وأنتم فاهمينها مو بس عشان الدرجة، لأنها بتفيدكم وقت الفاينل وتخلي المراجعة أسهل.
إذا جمعتوا درجات من الميد، والكويزات، والواجبات، والمشاريع، مرة ثانية بيدخل عليكم الفاينل وأنتم مرتاحين وعندكم هامش للخطأ. ولا تنسون أن الفاينل غالبًا يكتبه أكثر من دكتور، فكل ما كان أساسكم قوي من بداية الترم، كل ما صار التعامل مع أي سؤال أسهل.
بإذن الله إذا التزمتوا باللي فوق، فالـ A+ مو شي صعب، توكلوا دائمًا والله يوفقكم جميعًا.