التجربة 3

تجربتي لأول سنة، تخصص هندسة البرمجيات:

أول شي من ناحية المواد، تحتاج مذاكرررة، والأفضل تكون أول بأول، ما أنصح نهائيًا إنكم تراكمونها، لأنها تبي لها وقت وفهم وصبرر ومذاكرة "بذمة وضمير".

بخصوص مواد الماث وكذا، نصيحتي إنكم تذاكرونها ورقي وتطبقون بيدكم بالتمام، لأن الفاينل ورقي أساسًا، بنظري الورقي لمواد الماث والقوانين يثبّت المعلومات أكثر. وبرضو لو فيه شباتر واجهتكم صعوبة فيها، نصيحتي لكم افهموها مرة ومرتين وثلاث، وسووا لكم ملخصات تفيدكم بالمراجعة بعدين. بختصار، عطوا المادة حقها وزيادة، وخلوكم صبورين.

مواد البرمجة تطبيق عملي عملي عملي، تدربوا كثير وطبقوا بنفسكم اللابات على طول بعد كل محاضرة، ذاكروها وطبقوا وتدربوا كثيرر، ولو ما فهمتوا ارجعوا عيدوا وافهموا.

بس هذا هو، حسيت أغلب المواد كانت ماث، والأساس أكيد برمجة، فقلت أعطيكم نصايح لهم بالذات.

تنبيه بسيط: المواد اللي ساعاتها كثيرة، ٤ ساعات مثلًا، تأثر بالمعدل بشكل كبير، حاولوا القريد حقكم فيها ما ينزل عن B+. وطبعًا بقية المواد شدوا حيلكم فيها، انتبهوا لا تركزون على مواد وتهملون مواد! كلها تأثر بالمعدل، بس أكيد كل ما زادت ساعات المادة زاد تأثيرها على المعدل.

نهائيًا لا تشيلون هم، التخصص ممتع جدًا ومواده ممتعة، بس انتوا عطوها حقها وذاكروها كويس وخلوكم صبورين، ومن بدري ذاكروها.

"عشان أكون صادقة، أغلب المواد كنت مع خصوصيين"، لذلك لو واجهتكم صعوبة بمادة معينة، أنصحكم تشتركون مع خصوصيين شرحهم يناسبكم.

وبس، لا تنسوني من خير دعواتكم، وأتمنى إني أفدتكم ❤️