التجربة 4-5

التجربة 4

أنا تخصصي أمن سيبراني تأهيلي، وكتأهيلي يعني ما كان عندي رفاهية الإهمال أو المذاكرة ليلة الاختبار. فكنت بداية السنة، الصدق، أجرب أذاكر بطرقي القديمة زي طريقة الـ٢٥ دقيقة وبعدها بريك، ومافادت. وجربت أكثر من طريقة ما فادت، لا مع التعفن الدماغي ولا مع دسامة المواد.

فاللي اكتشفته على نهاية الترم الأول إنه التكرار والمراجعة المستمرة مرة تنفع، لأن بالمرة الأولى بفهم ٥٠٪، المرة الثانية ٨٠٪، لين أوصل للفهم والحفظ والإدراك التام. كنت أول مرة أشوف الشروحات سواء مقطع أو بنفسي أفهم من السلايدات نصًا وأشر على النقاط الدسمة اللي تحتاج تركيز، والمرة الثانية أرجع أراجع لكن من نفس السلايدات وكأني أشرح، والمرة الثالثة أسوي من تطبيق Notebook اختبار وملخص نص وبطاقات أسئلة، وليلة الاختبار أراجع لو فيه تسريبات. وبكذا أكون قفلت بنسبة ١٠٠٪ من المادة من كل النواحي والمراحل اللي ذكرتها. مو شرط تكون ورا بعض، بعضها كانت بينها أسبوع وبعضها أكثر، بس الفكرة بالتكرار.

وبالترم الثاني استوعبت إنه ما له داعي أوصل للفاينل وأقعد خايفة بمادة معينة إني أعديها أو لا، لأن للأسف صارت في مادة وحدة معايا كذا. فكنصيحة ثانية: من بدري اضمنوا الميدات، عشان في الفاينل يصير تفكيركم بكيف أجيب درجات أعلى بدون توتر وضغط.

وأهم نصيحة: الدعاء، واحتسبوا الأجر كل يوم بخط الجامعة، لأنه في سبيل طلب العلم.

والله يوفقكم جميعًا وادعولي❤️

التجربة 5

هذي نصايحي:

١- ذاكروا أول بأول، لا تأجلون أي شي.

٢- افهموا كل مادة كيف تذاكرونها، مثلًا: التفاضل تحلون تمارين. المنطق الرقمي تفهمون كل فكرة ووش تطبيقها بالواقع. أما المواد النظرية زي التشفير التطبيقي ومقدمة بالأمن السيبراني، هذي بكل اختصار يبغى لها حفظ: مروا على السلايدات وافهموا الفكرة العامة، بعدين ابدأوا احفظوا. ولا تنسون حتى المواد اللي تعتمد على الفهم يبغى لها حفظ لبعض الأشياء.

٣- لا تذاكرون بأي كلام. هذا الكلام كان يجي براسي كل ما دخلت اختبار خايس وتمنيت لو أني ذاكرت بشكل أفضل. حاولوا ما تسوّفون وانتوا تذاكرون، لأن كله من درجاتكم ومعدلكم 🙏🏼🙏🏼

لو أني ركزت على ذي الأشياء كان ما انضغطت أبدًا، معدلي كامل بس تمنيت لو سويت كذا عشان ما أضيع وقتي وجهدي ☝🏼

وبس، بالتوفيق 🫡💖